منين أجيب مقص مجنون زيى
بس نص نص
وأجيب ورق وأفضل أقص ..أقص..أقص
أفضل أقصقص ورد على كل لون
لحد ما أعمل عندى حبة كتير كتير
وأركب لى نسمة .. وأطير ..أطير
وأحفن وأدردب ع البلاد
مطر غزير..
ينزل يرخ ..يرخ على قرعة بنات أخت البشر
يتسبسبوا ..ويتشيكوا
ويبقوا لابسين لا مؤاخذة طراطير
ويا سلام
لو كان معايا وقتيها قلم كوبيا طويل
طويل ..طويل
أبله من قلبى إللى عرقان من السفر
وأكتب به وأنا طاير ..على خد القمر
أنا بحبك يا جميل
قصاقيص ورق
لكن مطر
يرخ جامد ...قد ما يحبوا الولاد
يا دوب كدة
مقدار ما يجروا ..ويمسكوا
مطر ...خطر
ينزل على كتاف العجايز ...يضحكوا
يشبك فى سلك التلفون
هنا .وهنا . وهنا . وهنا
على كل لون
وإللى فى جنازته فى التابوت يفوت .. يبص
يلاقى عالم كله.كله.كله .زينة عيد ميلاد
ويبقى فصل ..لكن مافيش بالشكل دة
لابد من عيد الميلاد
أنا عيد ميلادى مالوش ميعاد
فين الورق والنسمة والمقص والقلم ..يا واد
والا بلاش ..دة مافيش أمل
أعياد تير ..بيبتدوا .وبيفرغوا
وبيفضل العالم كدة
مكبوس ودمه تقيل ..تقيل
يا ربنا
ياللى خلقت لنا الأيادى ..للهزار وللعمل
إدينى قوة ألف مليون إيد
عشان
أزغزغه
يا رب ياللى خلقت لنا القلوب
علشان تحب بلا خجل
إدينى إحساس ألف مليون قلب
عشان أعشقه
وأقول كلام ....أجمل كلام
فى العشق حد ينطقه
مش مهم ..أقول لمين
مش مهم ..مين يسمعه ويصدقه
مش مهم ...كمان يكون
كلام رزين ليه منطقه
المهم ..يكون جميل ..من قلبى طالع
حرف حرف ...سَرسَبة
تبقى كلمة حب حلوة
فيها سحر ....وكهربة
هنا .وهنا . وهنا .وهنا
بألف معنى مختلف
وبتتعرف ...وبتتوصف
وبتتكشف ...ولا بانكسف
ليه الكسوف ...ليه الخجل
والغرام على كل لون
زى الفصول ...زى المواسم
وكل موسم ليه أوان..وليه بشاير
منها ممكن تعرفه
وتلاقى عالم كله كله كله
زينة عيد ميلاد
مافيش جمال بالشكل دة
وأنا عيد ميلادى مالوش ميعاد
لأنى من مواليد بلاد
بيحبوا ينسوا ...قد ما بيحبوا الولاد
يادوب كدة ..علمونى أمسك قلم
وأكتب حروف متشبكة على الورق
مرة سهلة بتتفهم
ومرة تانية ملخبطة
ومرة كلمة ..أشوفها إيد
ماسكة فى إيدين البشر ..وقت الخطر
ومرة أشوفها ..
زى نسمة هوا ...أو قطرة مطر
والناس تروح وتغيب
والكلمة تفضل للأبد
ويفضل العالم كدة
مكبوس ودمه تقيل تقيل
وعشان معايا قلم كوبيا
طويل ..طويل
باكتب به وأنا طاير على خد القمر
أنا بحبك يا جميل
يقراها كل الناس
على قصاقيص الورق
يفرحوا ...ويضحكوا
يضحك العالم ساعتها
ويفضل كدة
يضحك
كتير ..كتير ..
كأن أنا
بازغزغه
موضوع: من وحى عبقرية (صلاح جاهين ) فى ذكراه...قصاقيص ورق !! 
